Energjia është identifikuar si një nga fushat prioritare me potencial inovativ gjatë fazës mapping të zhvilluar në kuadër të Strategjisë për Specializimin Inteligjent (S3). Hartimi i S3 është pjesë e detyrimeve të Shqipërisë sa i takon procesit të negociatave për anëtarësim në BE, specifikisht Kapitullit 20 “Ndërmarrjet dhe Politikat Industriale” dhe Kapitullit 25 “Shkenca dhe Kërkimi” si dhe pjesë e planit të veprimit të Ballkanit Perëndimor 2021-2024, në kuadër të procesit të Berlinit, gjithashtu, pjesë e agjendës së BE për inovacionin për Ballkanin Perëndimor 2021-2027.

Në këtë kontekst, Ekipi Kombëtar i S3, me mbështetjen e Bashkimit të Prodhuesve Shqiptarë, organizoi, sipas metodologjisë së Qendrës së Përbashkët Kërkimore të Komisionit Evropian (JRC), një tryezë të rrumbullakët për energjinë e rinovueshme më 16 nëntor 2022.

Në këtë event morën pjesë rreth 30 përfaqësues nga helika e katërfishtë (qeveri, akademi, biznes, shoqëri civile). Pjesëmarrësit dhanë një kontribut të çmuar duke shpalosur nevojat e sektorit dhe zgjidhjet e mundshme për zhvillimin inteligjent në energji.

Takimi nisi me fjalën përshëndetëse të dy prej anëtarëve të panelit: z.Gjergji Simaku, Zëvendësministër në Ministrinë e Infrastrukturës dhe Energjisë dhe znj. Albana Tole, Zëvendësministre në Ministrinë e Arsimit dhe Sportit. Z.Arben Shkodra, sekretar i përgjithshëm i Bashkimit të Prodhuesve Shqiptare, pjesë e panelit të tryezës, orientoi diskutimin në dy pjesë. Pjesa e parë e takimit kishte në qendër sfidat, mundësitë dhe perspektivën për zhvillimin e sektorit të energjisë, ndërsa në pjesën e dytë u analizua rrugëtimi drejt një specializimi inteligjent në sektorin e energjisë së rinovueshme.

Përfaqësuesit e heliksit të katërfishtë, kryesisht, shtjelluan temat si vijon:
- Masat strategjike të nevojshme për shfrytëzimin e potencialit të plotë të sektorit të energjisë, me në fokus nxitjen e inovacionit dhe kërkimit shkencor;
- Kapitali njerëzor, në aspektin e numrave dhe të ekspertizës, brain drain, si dhe rëndësia e një akademie të zhvilluar;
- Pozita e Shqipërisë në tregun rajonal e global dhe konkurrueshmëria;
- Përparësitë që ofron inovacioni teknologjik me qëllim specializimin e zgjuar të sektorit dhe forcimi i pozitës së Shqipërisë në tregun rajonal;
- Koordinimi mes aktorëve të helikës së katërfishtë për vendimmarrje të përbashkët për efekt të financimit dhe të investimeve afatgjata në sektor;
- Smart green.

Diskutimet e zhvilluara në këtë takim do të shërbejnë si bazë për workshop-in kombëtar në fushën e energjisë.