Bujqësia është identifikuar si një nga fushat prioritare me potencial inovativ gjatë fazës mapping të zhvilluar në kuadër të Strategjisë për Specializimin Inteligjent (S3). Hartimi i S3 është pjesë e detyrimeve të Shqipërisë sa i takon procesit të negociatave për anëtarësim në BE, specifikisht Kapitullit 20 “Ndërmarrjet dhe Politikat Industriale” dhe Kapitullit 25 “Shkenca dhe Kërkimi” si dhe pjesë e planit të veprimit të Ballkanit Perëndimor 2021-2024, në kuadër të procesit të Berlinit, gjithashtu, pjesë e agjendës së BE për inovacionin për Ballkanin Perëndimor 2021-2027.

Në këtë kontekst, Ekipi Kombëtar i S3, me mbështetjen e Bashkimit të Prodhuesve Shqiptarë, organizoi, sipas metodologjisë së Qendrës së Përbashkët Kërkimore të Komisionit Evropian (JRC), një tryezë të rrumbullakët për pylltarinë më 26 tetor 2022 në mjediset e Universitetit Bujqësor të Tiranës.

Në këtë event morën pjesë rreth 30 përfaqësues nga helika e katërfishtë (qeveri, akademi, biznes, shoqëri civile). Pjesëmarrësit dhanë një kontribut të çmuar duke shpalosur nevojat e sektorit dhe zgjidhjet e mundshme për zhvillimin inteligjent në pylltari.

Takimi nisi me fjalën përshëndetëse të dy prej anëtarëve të panelit: Prof. Asoc. Dr. Leonidha Peri, Dekan i Fakultetit të Pylltarisë, Universiteti Bujqësor i Tiranës; dhe Prof. Dr, Elvin Toromani, pedagog pranë Fakultetit të Pylltarisë, Universitetit Bujqësor të Tiranës. Z.Arben Shkodra, sekretar i përgjithshëm i Bashkimit të Prodhuesve Shqiptarë, pjesë e panelit të tryezës, orientoi diskutimin në dy pjesë. Pjesa e parë e takimit kishte në qendër sfidat, mundësitë dhe perspektivën për zhvillimin e sektorit të pylltarisë, ndërsa në pjesën e dytë u analizua rrugëtimi drejt një specializimi inteligjent në sektorin e pylltaririsë.

Gjatë takimit, të ftuarit shqyrtuan mes të tjerash temat e mëposhtme:
- Masat strategjike të nevojshme për shfrytëzimin e potencialit të plotë të sektorit të pylltarisë, me në fokus nxitjen e inovacionit dhe kërkimit shkencor;
- Roli kyç i kërkimit shkencor dhe i akademisë;
- Avantazhet që ofron aplikimi i teknologjisë së re në sektor;
- Bashkëpunimi mes heliksit të katërfishtë me synim zhvillimin e qëndrueshëm dhe afatgjatë të sektorit;
- Brain drain.

Diskutimet e zhvilluara në këtë takim do të shërbejnë si bazë për workshop-in kombëtar në fushën e bujqësisë.