Bujqësia është identifikuar si një nga fushat prioritare me potencial inovativ gjatë fazës mapping të zhvilluar në kuadër të Strategjisë për Specializimin Inteligjent (S3). Hartimi i S3 është pjesë e detyrimeve të Shqipërisë sa i takon procesit të negociatave për anëtarësim në BE, specifikisht Kapitullit 20 “Ndërmarrjet dhe Politikat Industriale” dhe Kapitullit 25 “Shkenca dhe Kërkimi” si dhe pjesë e planit të veprimit të Ballkanit Perëndimor 2021-2024, në kuadër të procesit të Berlinit, gjithashtu, pjesë e agjendës së BE për inovacionin për Ballkanin Perëndimor 2021-2027.
Në këtë kontekst, Ekipi Kombëtar i S3, me mbështetjen e Bashkimit të Prodhuesve Shqiptarë, organizoi, sipas metodologjisë së Qendrës së Përbashkët Kërkimore të Komisionit Evropian (JRC), një tryezë të rrumbullakët për peshkimin dhe akuakulturën më 26 tetor 2022 në mjediset e Universitetit Bujqësor të Tiranës.
Në këtë event morën pjesë rreth 25 përfaqësues nga helika e katërfishtë (qeveri, akademi, biznes, shoqëri civile). Pjesëmarrësit dhanë një kontribut të çmuar duke shpalosur nevojat e sektorit dhe zgjidhjet e mundshme për zhvillimin inteligjent në peshkim dhe akuakulturë.
Takimi nisi me fjalën përshëndetëse të tre prej anëtarëve të panelit: Prof. Asoc. Edmond Hala: Zëvendës Dekan i Fakultetit të Bujqësisë dhe Ambjentit, Universiteti Bujqësor i Tiranës; Prof. Asoc. Erjola Keci, Zëvendës Deakane e Fakultetit të Studimeve Profesionale “Aleksandër Moisiu” dhe kordinatore e projekteve ndërkombëtare në menaxhimin e ujrave; Prof. Asoc. Elvira Beli, kryetare e Departamentit të “Peshkimit dhe Akuakulturës”, Universiteti Bujqësor i Tiranës. Z.Arben Shkodra, sekretar i përgjithshëm i Bashkimit të Prodhuesve Shqiptarë, pjesë e panelit të tryezës, orientoi diskutimin në dy pjesë. Pjesa e parë e takimit kishte në qendër sfidat, mundësitë dhe perspektivën për zhvillimin e sektorit të peshkimit dhe akuakulturës, ndërsa në pjesën e dytë u analizua rrugëtimi drejt një specializimi inteligjent në sektorin e peshkimit dhe akuakulturës.
Përgjatë diskutimeve, theksi u vu në çështje të tilla si:
- Masat strategjike të nevojshme për shfrytëzimin e potencialit të plotë të sektorit të peshkimit dhe akuakulturës, me në fokus nxitjen e inovacionit dhe kërkimit shkencor;
- Mungesa e burimeve njerëzore, kualifikimi i forcës punëtore, brain drain, si dhe rëndësia e akademisë;
- Konkurrueshmëria ne vend dhe rajon;
- Përparësitë që ofron teknologjia në sektor dhe zhvillimi i qëndrueshëm;
- Mundësitë e financimit;
- Bashkëpunimi mes katër helikave me qëllim nxitjen e specializimit inteligjent.
Diskutimet e zhvilluara në këtë takim do të shërbejnë si bazë për workshop-in kombëtar në fushën e bujqësisë.
